Barakaldok mikrokontakizunen hamaikagarren lehiaketa deitu du 500 euro banatzeko sarietan

Barakaldo, 18 abr 2026. Barakaldoko Kultur Ekipamenduen Hurbileko Sareak mikrokontakizunen hamaikagarren lehiaketa deitu du euskarazko literatur sormena bultzatzeko asmoarekin. Parte-hartzaileek 20 hitz baino gutxiagoko testu originalak bidali behar dituzte apirilaren 30era arte, Barakaldoko Udalak ohar bidez jakinarazi duenez. [Albiste hau adimen artifizialaren bidez landu da eta editore giza-aditu batek orraztu du.]

Ekimena 16 urte beteta dituzten pertsona guztiei zuzenduta dago eta idazlanek 'Amets artean' esaldia barneratu behar dute derrigorrez. Deialdiak euskararen erabilera indartu nahi du herriko kultur esparruan, aurreko edizioetako ibilbideari jarraipena emanez.

Lanak 'whatsapp' edo 'telegram' bidez bidaliko dira 628 986 324 zenbakira, eta irabazleak 200 euroko saria jasoko du maiatzaren 21ean. Informazio gehiago eskuratzeko euskara@barakaldo.eus helbide elektronikoan kontsulta daitezke oinarri zehatzak.

Mikrokontakizunen XI. Lehiaketa

Euskarazko literatur sormena sustatu eta bultzatu nahian, Barakaldoko Kultur Ekipamenduen Hurbileko Sareak Mikrokontakizunen XI. Lehiaketarako deialdia egingo du.

1. Hala nahi duten 16 urtetik gorako guztiek har dezakete parte lehiaketa honetan euskarazko kategorian.

2. Parte-hartzaileek mikrokontakizun bat idatziko dute, eta bertan “Amets artean” hitzak sartuko dituzte, derrigorrean.

3. Mikrokontakizunak, “Amets artean” KONTATU GABE, gehienez 20 hitz izango ditu. Nahi izanez gero, izenburu bat ere jarri ahal izango zaio, eta izenburuko hitzak ere ez dira kontatuko.

4. Parte-hartzaile bakoitzak, gehienez, 2 mikrokontakizun aurkeztu ahal izango ditu, beti ere oinarri hauek xedatzen dituzten betekizunak aintzat hartuta.

5. Kontakizunak originalak, argitaragabeak eta aurrez saritu eta/edo argitaratu gabeak izango dira.

6. Kontakizunak Whatsapp edo Telegram bidezko mezu baten bitartez bidaliko dira ondoko telefono zenbakira: 628 986 324, inolako izen edo identifikazio-daturik adierazi gabe.

7. Mikrokontakizunak bidaltzeko epea 2026ko apirilaren 18ko 00:01etik apirilaren 30eko 23:59ra egongo da zabalik. Epe horretatik kanpo ez da mezurik onartuko.

8. Honako sari hauek banatuko dira:

  • 1. Saria: 200 €
  • 1. Akzesita: 150 €
  • 2. Akzesita: 150 €

9. Epaimahaia komunikazio, hizkuntza eta literatura alorreko profesionalek osatuko dute. Epaia apelaezina izango da, eta epaimahaiak ebatziko du oinarrietan agertzen ez den edozein gorabehera. Sariak eman gabe ere gera litezke.

10. Epaimahaiak 20 mikrokontakizunik onenak hautatuko ditu, ondoren horien artean sarituko diren 3 lanak aukeratzeko. Finalistak zein saritutako 3 lanak Barakaldo Euskaraz gizarte sareetan (Facebook, X, Instagram, Telegram) argitaratuko dira. 

11. Sariak 2026ko maiatzaren 21ean Clara Campoamor Zentro Zibikoan egingo den Sari Banaketa ekitaldian emango dira jakitera. 

12. Ez dute lehiaketan parte hartzerik izango ez epaimahaikideek, ez zuzenean antolakuntzarekin zerikusia duen inork. 

13. Barakaldoko Udalaren Kultura Arloak lan guztien jabetza bereganatuko du, baita eurak erakutsi, berregin edo argitaratzeko eskubidea ere. Lanak Udalaren kultur ondare bihurtuko dira eta ezin izango dira salerosi. 

14. Lehiaketa honetan parte hartzeak oinarriak oso-osoan onartzen direla esan nahi du. Aurkezteko baldintzak betetzen ez dituzten lanak atzera botako dira.

Datu pertsonalak babesteko abenduaren 13ko 15/1999 Lege Organikoaren 5. artikuluan adierazitakoa betez, jakinarazi nahi dizugu inprimaki honetan adieraziko dituzun datuak Kultur Aretoko Lehiaketetako partaideen datu-fitxategi batean erregistratuko direla; horren helburua deialdietan parte hartzen duten hautagaiak ezagutzea da; informazioa Barakaldoko Udalaren Kultur Arloko langile eta arduradunek jasoko dute eta fitxategiaren arduraduna Barakaldoko Udala izango da (Herriko Plaza, 1).

Informazio gehiago: euskara@barakaldo.eus

'BarakaldoDigital' tiene cuenta en las siguientes redes sociales

Artículo Anterior Artículo Siguiente